चालक तथा सह-चालकहरूको स्वास्थ्य परीक्षण, ११ जनामा लागू पदार्थ सेवन पोजेटिभ
भोजराज घिमिरे –
मोरङ, चैत्र २० – ट्राफिक सुरक्षा र सवारी सञ्चालनलाई सुरक्षित बनाउन मोरङ जिल्लाको बेलबारीमा विशेष स्वास्थ्य परीक्षण कार्यक्रम सम्पन्न भएको छ। जिल्ला ट्राफिक प्रहरी कार्यालय मोरङको आयोजनामा तथा कोशी प्रदेश प्रहरी अस्पताल इनरुवा, सुनसरी र विराट आँखा अस्पताल विराटनगरको सहकार्यमा बेलबारी नगरपालिका-१, ट्राफिक प्रहरी पोष्ट अगाडि यो कार्यक्रम सञ्चालन गरिएको हो।

स्वास्थ्य परीक्षण कार्यक्रममा ११५ जना चालक, सह-चालक तथा स्थानीय नागरिकहरूको रक्तचाप जाँच, आँखा परीक्षण तथा निःशुल्क औषधि वितरण गरिएको थियो। साथै, ट्रक, टिपर, बस, स्कुल बस, ट्याक्टर, पिकअप, म्याजिक, कार, मोटरसाइकललगायतका ५५ जना चालकहरूको लागू पदार्थ सेवन (ला.प.से.) परीक्षण गर्दा ११ जनामा लागू पदार्थ सेवन पोजेटिभ देखिएको जिल्ला ट्राफिक प्रहरी कार्यालय मोरङले जनाएको छ।

जिल्ला ट्राफिक प्रहरी कार्यालय मोरङका प्रमुख प्रहरी निरीक्षक राजन लम्सालका अनुसार, यो कार्यक्रम सडक सुरक्षालाई प्रभावकारी बनाउन तथा दुर्घटनाको जोखिम न्यून गर्न आयोजना गरिएको हो। लागू पदार्थ सेवन पोजेटिभ देखिएका चालकहरूमाथि आवश्यक कानुनी प्रक्रिया अघि बढाइने उनले जानकारी दिए।

प्रहरीका अनुसार, यस्ता कार्यक्रमले सवारी चालकहरूलाई सुरक्षित यात्राका लागि सचेत बनाउन मद्दत पुग्ने विश्वास गरिएको छ। ट्राफिक प्रहरीले भविष्यमा पनि यस्ता अभियानलाई निरन्तरता दिने प्रतिबद्धता जनाएको छ।