विराटनगर, फागुन २८ – सञ्चार क्षेत्रमा पत्रकार महिलाहरूको भूमिका, चुनौती, अवसर र उनीहरूको सशक्तीकरणका विषयमा केन्द्रित एक विशेष अन्तरक्रिया कार्यक्रम सम्पन्न भएको छ। नेपाल पत्रकार महासंघ मोरङको आयोजनामा तथा कोशी प्रदेश सरकारअन्तर्गत सामाजिक विकास मन्त्रालयको सहकार्यमा सम्पन्न कार्यक्रममा महिला पत्रकारहरूको संख्यात्मक तथा गुणात्मक सहभागिताका विषयमा गहिरो छलफल भएको थियो।
कार्यक्रममा सहभागी वक्ताहरूले सञ्चार क्षेत्रमा महिलाहरूले सामना गर्ने चुनौतीहरूको चर्चा गर्दै लैंगिक समानता र समान अवसर सुनिश्चित गर्न सबै सरोकारवालाहरूको सक्रिय सहभागिता आवश्यक रहेको औँल्याए। पत्रकार महिलाहरूको हक, हित तथा उनीहरूको क्षमता अभिवृद्धि गर्ने सवालमा संस्थागत सुधार, सुरक्षित कार्यस्थलको सुनिश्चितता तथा नीति निर्माणमा उनीहरूको सक्रिय भूमिका अपरिहार्य रहेको धारणा व्यक्त गरियो।
नेपाल पत्रकार महासंघ मोरङका प्रतिनिधिले महासंघले महिला पत्रकारहरूको सशक्तीकरणका लागि निरन्तर पहल गरिरहेको जानकारी गराउँदै आगामी दिनमा थप प्रभावकारी कार्यक्रम सञ्चालन गर्ने प्रतिबद्धता व्यक्त गरे।
महिला सहभागिता लोकतन्त्रको सशक्त आधार
११५औँ अन्तर्राष्ट्रिय महिला दिवसको अवसरमा आयोजित कार्यक्रममा कोशी प्रदेशकी राज्यमन्त्री सृजना राईले लोकतन्त्रको प्रवर्द्धनका लागि महिलाको अर्थपूर्ण सहभागिता अपरिहार्य रहेको बताइन्।
उनले भनिन्, “महिलाहरूलाई सजावटका रूपमा मात्रै देखिनु दुर्भाग्यपूर्ण छ। महिला सहभागिता समाजमा विद्यमान विभेद, असमानता, र पितृसत्तात्मक सोच हटाउन आवश्यक छ। नेतृत्वदायी भूमिकामा महिलाको प्रभावकारी सहभागिता सुनिश्चित गर्न सबै पक्षको साझा प्रयास जरुरी छ।”
राज्यमन्त्री राईले समाजको दृष्टिकोण परिवर्तन नगरेसम्म पुरुषवादी संरचना तोड्न कठिन हुने उल्लेख गर्दै, महिलाको कार्यक्षमतामा विश्वास गर्न र उनीहरूलाई अगाडि बढ्न प्रेरित गर्नुपर्ने धारणा राखिन्। “पुरुषको तुलनामा महिला नेतृत्वमा सुशासनको राम्रो अभ्यास देखिएको छ। त्यसैले समतामूलक समाज निर्माणका लागि महिलालाई हरेक क्षेत्रमा नेतृत्वदायी भूमिका प्रदान गर्नुपर्छ,” उनले जोड दिइन्।
महिला पत्रकारका लागि विशेष बजेटको प्रतिबद्धता
सामाजिक विकास मन्त्रालयका सचिव हेमराज तामाङले महिला पत्रकारहरूको आत्मरक्षा र क्षमता अभिवृद्धिका लागि आगामी बजेटमा विशेष व्यवस्था गर्ने प्रतिबद्धता व्यक्त गरे। महिला सञ्चारकर्मीको सुरक्षा, तालिम, अवसर र सशक्तीकरणका लागि प्रदेश सरकारले आवश्यक नीतिगत पहल गर्ने उनको भनाइ थियो।
कार्यपत्र प्रस्तुति र सरोकारवालाहरूका विचार
कार्यक्रममा पत्रकार बन्धु पोखरेल र महाप्रसाद खतिवडाले “सञ्चार क्षेत्रमा महिला पत्रकारहरूको अर्थपूर्ण सहभागिता” विषयक कार्यपत्र प्रस्तुत गरेका थिए। कार्यक्रममा नेपाल पत्रकार महासंघका केन्द्रीय सदस्य कमल रिमाल, महासंघ कोशी अध्यक्ष भरत खड्का, पत्रकार विक्रम लुइटेललगायतका व्यक्तिहरूले आफ्नो धारणा राख्दै महिला पत्रकारहरूको भूमिका थप प्रभावकारी बनाउन आवश्यक उपायहरूबारे प्रकाश पारे।
नेपाल पत्रकार महासंघ मोरङकी अध्यक्ष सुशिला पाठकको अध्यक्षतामा सम्पन्न कार्यक्रमले सञ्चार क्षेत्रमा महिला पत्रकारहरूको उपस्थिति अझै मजबुत बनाउन ठोस रणनीति अपनाउनुपर्ने निष्कर्ष निकालेको छ।
