विराटनगर (हाम्रो खेलकुद)- अष्ट्रेलियन अलराउन्डर बेन कटिङ लुम्बिनी लायन्सबाट जारी नेपाल प्रिमियर लिग (एनपिएल) खेल्न नेपाल आइपुगेका छन्।
कटिङले आफ्नो करियरमा विश्वभरका टि ट्वान्टी लिगहरूमा खेलिसकेका छन् । उनले इन्डियन प्रिमियर लिग (आइपिएल), बिग बास लिग (बिबिएल), पाकिस्तान सुपर लिग (पिएसएल) र क्यारिबियन प्रिमियर लिग (सिपिएल) जस्ता ठूला फ्रेन्चाइजहरूमा सहभागी भइसकेका छन् ।
सनराइजर्स हैदरवादले सन् २०१६ को आइपिएलको उपाधि दिलाउन उनको भूमिका महत्वपूर्ण रहेको थियो।
एनपिएलको हिस्सा हुन पाउँदा र विशेषगरी लुम्बिनी लायन्समा सामेल हुन पाउँदा उनले आफू निकै उत्साहित भएको बताएका छन्।
१ सय ७० भन्दा बढी टि ट्वान्टी खेल खेलेका उनले २ हजार भन्दा बढी रन बनाउँदै १ सय २६ विकेट लिएका छन्।
राष्ट्रिय क्रिकेट टोलीका कप्तान रोहितकुमार पौडेल लुम्बिनी लायन्सको मार्की खेलाडी हुन्। लुम्बिनी लायन्सले आफ्नो पहिलो खेल बुधवार विराटनगर किङ्ससँग खेल्नेछ।
