गोरखा । पूर्वराजा ज्ञानेन्द्र शाह शनिबार गोरखा पुगेका छन्। उनले गोरखकाली मन्दिरमा पूजाअर्चना गर्दै देशमा शान्ति, समृद्धि, र विकासको कामना गरेका छन्।
मन्दिर परिसरमा सञ्चारकर्मीसँग कुरा गर्दै उनले गोरखा आफ्नो जन्मथलो नभए पनि पुर्ख्यौली थलो भएकाले यहाँ आउँदा आनन्द महसुस भएको बताए। “गोरखा मेरो जन्मथलो नभए पनि मेरो पुर्खाको भूमि हो। यहाँ आएर सबैलाई भेट्न पाउँदा खुसी लागेको छ,” उनले भने।
पूर्वराजाले देशमा शान्ति आवश्यक रहेको बताउँदै सबैलाई सकारात्मक सोच राख्न आग्रह गरे। “देशमा अहिले शान्ति चाहिएको छ। कसैले कसैको कुभलो नचिताओस्, सबैको भलो होस्। देशमा शान्ति र विकास होस्, सबैलाई सुख-समृद्धि प्राप्त होस्,” उनले भने।
पूर्वराजाले गोरखकाली मन्दिरमा करिब दुई घण्टा बिताएका थिए। उनले गोरखनाथ मन्दिरमा पनि पूजाअर्चना गरे। त्यस्तै, भूकम्पपछि पुनर्निर्माण गरिएको ऐतिहासिक गोरखा दरबारको अवलोकन समेत गरेका थिए।
पूर्वराजाको आगमनलाई लिएर स्थानीयवासी र उनका समर्थकहरू उत्साहित देखिएका थिए। केही समर्थकहरूले राजसंस्थाको समर्थनमा नारा समेत लगाएका थिए।
पूर्वराजा शाह आइतबार मनकामना मन्दिरमा पूजाअर्चनाका लागि जाने कार्यक्रम रहेको छ।
