विराटनगर, फागुन १८ – “विराटनगरको साथ फुटबलको विकास” भन्ने नाराका साथ रमपम विराट गोल्डकप फुटबल प्रतियोगिता २०८१ को नवौं संस्करण विराटनगरको शहीद रंगशालामा फागुन १९ गतेदेखि २८ गतेसम्म आयोजना गरिने भएको छ। आयोजक समितिले आज पत्रकार सम्मेलन गर्दै प्रतियोगिताका सम्पूर्ण तयारी पूरा भइसकेको जानकारी गराएको छ।
१० टिमको प्रतिस्पर्धा
प्रतियोगितामा १० टिमले प्रतिस्पर्धा गर्ने छन्, जसमा भारतका २ टिम तथा नेपालका विभागीय टिमहरू सहित ८ टिम सहभागी हुनेछन्। खेल तालिका सार्वजनिक भइसकेको छ।
१ करोड ३५ लाख खर्चको अनुमान
प्रतियोगिता सम्पन्न गर्न रु. १ करोड ३५ लाख खर्च हुने अनुमान गरिएको छ। यस प्रतियोगितालाई सफल बनाउन कोशी प्रदेश सरकार, विराटनगर महानगरपालिका, राष्ट्रिय खेलकुद परिषद, अखिल नेपाल फुटबल संघ (ANFA), मोरङ उद्योग व्यापार संघ लगायतका निकायहरू संरक्षक र प्राविधिक सहयोगीका रूपमा रहेका छन्।
पुरस्कार राशी
विजेताले रु. ११ लाख, उपविजेताले रु. ५ लाख नगद पुरस्कार प्राप्त गर्नेछन्। साथै, उत्कृष्ट प्रशिक्षक, उत्कृष्ट गोलरक्षक, सर्वाधिक गोलकर्ता र प्रत्येक खेलका म्यान अफ दी म्याचलाई पनि नगद पुरस्कार दिइनेछ।
प्रचार-प्रसारमा विशेष ध्यान
प्रतियोगिताको प्रचारलाई प्रभावकारी बनाउन विराटनगरका विभिन्न स्थानहरूमा होर्डिङ बोर्ड, एल गेट, सिटी रिक्सा प्रचार, डिजिटल प्लेटफर्म (फेसबुक, टिकटक, युट्युब) मार्फत प्रवर्द्धन गरिंदैछ। साथै, १० वटा स्कुल तथा कलेजमा प्रचारात्मक कार्यक्रमहरू सञ्चालन भइसकेका छन्।
सांस्कृतिक कार्यक्रम र विशेष आकर्षण
प्रतियोगिताको उद्घाटन र समापन भव्य बनाइने आयोजक समितिले जनाएको छ। साथै, राष्ट्रिय स्तरका कलाकारहरूद्वारा सांस्कृतिक कार्यक्रम, “Face of The Birat Goldcup” प्रतिस्पर्धा, तथा TikTok प्रतियोगिता समेत गरिनेछ। प्रतियोगितामा सहभागी दर्शकहरूलाई विशेष छुट सहितको टिकट योजना पनि ल्याइएको छ।
सुरक्षा व्यवस्था कडा
प्रतियोगिताको शान्तिपूर्ण संचालनका लागि सुरक्षा निकायहरूसँग छलफल गरिसकिएको छ। मैदान व्यवस्थापन, लाइटिङ चेकजाँच लगायतका अन्तिम तयारीहरू पूरा भइसकेका छन्।
आयोजक समितिका संयोजक नवीन रिजालका अनुसार, “यो प्रतियोगिता विराटनगरको खेलकुद इतिहासको महत्वपूर्ण हिस्सा हो। फुटबलप्रेमी दर्शकहरूको अपार माया र साथले हामीलाई यो प्रतियोगिता भव्य बनाउन प्रेरित गरिरहेको छ।”
प्रतियोगितालाई भव्य रूपमा सम्पन्न गर्न आयोजक समितिले सबै पक्षबाट सहयोग र सद्भावको अपील गरेको छ।
