काठमाडौं – क्रिकेटर सन्दीप लामिछानेविरुद्ध बिहीबार पनि सर्वोच्च अदालतमा जबर्जस्तीकरणीको मुद्दाको सुनुवाइ हुँदैछ ।
बुधबार बहस नसकिएपछि मुद्दा हेर्दाहेर्दैमा राखिएको छ । बुधबार जाहेरी पक्षका वकिलहरुले बहस सकेसँगै बिहीबार सन्दीप पक्षका वकिलको बहस हुनेछ ।
सन्दीपतर्फबाट अधिवक्त मुरारी सापकोटाले सुरुवाती बहस गरेका थिए ।
उनको पक्षमा वरिष्ठ अधिवक्ताहरु रमण श्रेष्ठ, किशोर सापकोटा, शम्भु थापा, अधिवक्ता सरोजकृष्ण घिमिरेलगायतले बहस गर्दैछन्।
न्यायाधीश शिशिरराज ढकालको इजलासमा आइतबारदेखि सुरु भएको सुनुवाइमा सरकारी वकिल र पीडितका कानुन व्यवसायीले बहस गरेका छन् ।
आज सन्दीपका कानुन व्यवसायीको बहसपछि पीडित पक्ष र सरकारी पक्षले जवाफी बहस गर्नेछन् भने त्यसपछि मात्रै अदालतको फैसला आउनेछ ।
२०७९ भदौ २१ गते एक किशोरीले जबर्जस्ती करणी गरेको भन्दै गौशाला प्रहरी वृत्तमा जाहेरी दिएपछि असोज २० गते नेपाल फर्किएका सन्दीप विमानस्थलबाटै पक्राउ परेका थिए ।
सोही वर्षको कात्तिक १५ गते मुद्दा दर्ता भएकामा काठमाडौं जिल्ला अदालतले कात्तिक १८ गते सन्दीपलाई पुर्पक्षका लागि थुनामा पठाउन आदेश दिएको थियो ।
जिल्लाको सो आदेशविरुद्ध पाटन उच्च अदालत पुगेका सन्दीपलाई उच्च अदालतले २०७९ पुस १८ गते देशबाहिर जान नपाउने सर्तसहित २० लाख धरौटीमा रिहा गरेको थियो ।
उच्च अदालतको उक्त आदेशविरुद्ध महान्यायाधिवक्तको कार्यालय र सन्दीप दुवै सर्वोच्च पुगेका थिए ।
२०७९ कात्तिक १५ गतेदेखि काठमाडौं जिल्ला अदालतमा विचाराधीन मुद्दामा पटकपटक पेसी तोकिए पनि अहिलेसम्म फैसला हुन सकेको छैन ।
यदि बलात्कार मुद्दामा सन्दीपविरुद्ध फैसला आएमा उनको क्रिकेट करियरमै पूर्णविराम लाग्ने निश्चित छ ।
