विराटनगर— त्रिभुवन विश्वविद्यालय, केन्द्रीय क्याम्पस स्वतन्त्र विद्यार्थी युनियनले पठनपाठन, परीक्षा तथा परीक्षाफल प्रकाशनको तालिका बिथोलिने गरी कुनै पनि आन्दोलनका कार्यक्रम नगरिने जनाएको छ । त्रिविको स्ववियु निर्वाचित भएको एक वर्ष पुगेको अवसरमा सोमबार कीर्तिपुरस्थित केन्द्रीय क्याम्पस भवनमा आयोजित पत्रकार सम्मेलनमा विद्यार्थी नेताहरुले कक्षा बिथोलिने नदिने अडान सुनाए ।
कार्यक्रममा स्ववियुको विगत एक वर्ष र आगामी कार्ययोजनाबारे जानकारी दिँदै स्ववियु सभापति श्यामराज ओझाले शैक्षिक पात्रो सुनिश्चित गरी कडाइका साथ लागू गराउन हरसम्भव प्रयास गरिने बताए । ‘कक्षा सुरु हुने, समाप्त हुने, परीक्षा सञ्चालन र परीक्षाफल प्रकाशनसम्मको तिथिमिति निश्चित भएको शैक्षिक पात्रो चाहन्छौँ र त्यसका लागि आन्दोलनले पढाइ बिथोलियो भन्ने अवसर दिँदैनौँ,’ उनले भने ।
शैक्षिक पात्रोकै लागि गत पुस ११ गतेदेखि निरन्तर दबाब दिएपछि त्रिविले हालै शैक्षिक पात्रो प्रकाशित गरेको तर परीक्षाफल प्रकाशन हुने मिति नतोकिएका कारण स्ववियुलाई मान्य नभएको उनले बताए । समयमा पढाइ र परीक्षा तथा परीक्षाफल प्रकाशित नहुने अवस्थाले त्रिविलाई चौतर्फी समस्यामा पारेको उनको भनाइ थियो ।
परीक्षालगायत त्रिविका सबै शैक्षिक कार्यक्रम अतिकेन्द्रीकरणका कारण जटिल र ढिलासुस्तीग्रस्त बनेको स्ववियु सभापति ओझाको भनाइ थियो । त्यसैले शैक्षिक कार्यक्रम विकेन्द्रीकृत गर्दै लैजानसमेत स्ववियुले दबाब दिने उनले बताए । साथै विश्वविद्यालयका चारवटै अनुसन्धान केन्द्रहरुलाई पुनः सक्रिय बनाई राज्यलाई आवश्यक अनुसन्धान गर्ने केन्द्रीय थलो बनाउन पनि दबाब दिइने स्ववियुले जनाएको छ । विश्वविद्यालयमा निश्चित मापदण्डका आधारमा मात्रै नियुक्ति गर्ने प्रणाली तयार गर्न पनि दबाब दिने स्ववियुले जनाएको छ ।
त्रिवि स्ववियुले केन्द्रीय क्याम्पसका विद्यार्थीलाई अनुसन्धान परियोजनामा संलग्न गराएर ‘पढ्दै र कमाउँदै’ को शैली अपनाउने र उनीहरुले प्रयोगात्मक अभ्यास गर्ने समय अनुकुल बनाएर कक्षाहरु चलाउन पनि स्ववियुले दबावका कार्यक्रम गर्ने जनाएको छ । कार्यक्रममा दिइएको जानकारीअनुसार गत वर्ष त्रिवि स्ववियुको दबाब र पहलस्वरुप केन्द्रीय पुस्तकालय सातामा ६ दिन २४ घण्टा खुल्ने र शनिबार बिहान १० देखि साँझ ५ बजेसम्म खुल्न थालेको छ ।
यसैगरी, बन्द भएका छात्रावास थप ८० अटाउने गरी मर्मतसम्हार गराई खुल्ने अवस्थामा रहेको तथा त्रिविका अन्य भौतिक संरचना सुधार तथा खेलकुद, ‘क्याफ्टेरिया’लगायत काम स्ववियुको पहलमा भएको जनाएको छ ।
